ໂດຍ: ຈັນທິບ
ເປັນວັນສຳຄັນອີກວັນໜຶ່ງຂອງພຸດທະສາສະໜາທີ່ສືບຕໍ່ກັນມາແຕ່ດັ່ງເດີມນັ້ນກໍ່ຄື ວັນບຸນເຂົ້າພັນສາ ເຊິ່ງນອກຈາກເປັນວັນສຳຄັນທີ່ຄົນລາວຊາວບຸນເຮົາໃຫ້ຄວາມສຳຄັນແລ້ວວັນດັ່ງກ່າວຍັງເປັນວັນທີ່ຜູ້ປະກອບການຂາຍເຄື່ອງກອງບຸນລໍຄອຍກຽມ
ພ້ອມເພື່ອນຳສີນຄ້າມາວາງຈຳໜ່າຍ ແລະ ປີນີ້ຕາມການສອບຖາມບັນດາແມ່ຄ້າຂາຍເຄື່ອງກອງບຸນຢູ່ຕະຫຼາດຂົວດິນຕ່າງກໍ່ກ່າວດ້ວຍຮອຍຍີ້ມວ່າ: ໃກ້ຮອດວັນບຸນເຂົ້າພັນສາສີນຄ້າເລີ່ມໄດ້ຂາຍດີແລ້ວ ແລະ ຄາດວ່າວັນເສົາ, ວັນອາທິດນີ້ຊາວພຸດເຮົາຈະເລີ່ມລັງໄຫຼເຂົ້າມາຊື້ເພີ່ມຂື້ນຢ່າງແນ່ນອນ.
ຕາມການສອບຖາມຂອງບັນດາແມ່ຄ້າຂາຍເຄື່ອງກອງບຸນທີ່ຕະຫຼາດຂົວດິນນະຄອນຫຼວງວຽງຈັນເຊິ່ງໃນນັ້ນມີຮ້ານ ນາງ ມະນີວັນຂາຍເຄື່ອງກອງບຸນ, ຮ້ານປ້າຄຳຂາຍເຄື່ອງກອງບຸນ, ຮ້ານນາງສີນ ເຊິ່ງຜູ້ປະກອບການດັ່ງກ່າວຕອບຄ່າຍຄືກັນວ່າ: ໃກ້ຮອດວັນບຸນເຂົ້າພັນສາເລີ່ມມີຊາວພຸດມາຈັບຈ່າຍໃຊ້ຊອຍຊື້ເຄື່ອງເພື່ອຫ້າງຫາກະກຽມໃວ້ ແລ້ວໃນວັນເຂົ້າພັນສາ.
ປ້າ ຄຳ ສົມບູນຂັນໄດ້ບອກກັບນັກຂ່າວໜັງສືພີມເສດຖະກິດ-ສັງຄົມກັບພວກເຮົາວ່າ: ຕົນຢຶດອາຊີບຄ້າຂາຍເຄື່ອງກອງບຸນມາ ໄດ້ເກືອບ 20 ປີແລ້ວຕັ້ງແຕ່ຍັງບໍ່ມີຄົນຂາຍຫຼາຍເທື່ອ ເຊິ່ງວັນບຸນເຂົ້າພັນສາແຕ່ລະປີບໍ່ເຄີຍສ້າງຄວາມຜິດຫວັງໃຫ້ຕົນ ແລະ ປີນີ້ກໍ່ເປັນອີກປີໜຶ່ງທີ່ປ້າຄອງຄອຍ ເພາະໝາຍເຖິງລາຍຮັບທີ່ເພີ່ມ ຂຶ້ນໄດ້ເປັນກອບເປັນກຳ.
ສ່ວນສີນຄ້າຫຼັກໆທີ່ຕົນຂາຍກໍ່ຈະເປັນຜ້າສະບົງ, ຜ້າໄຕ, ທຽນ ພັນສາ, ທູບຜ້ານ້ຳຝົນ, ຄຸສັງກະທານ ແລະ ອື່ນໆອີກຫຼາຍຢ່າງ ເຊິ່ງປະຈຸບັນເລີ່ມມີຊາວບຸນເຂົ້າ ມາຈັບຈ່າຍຊື້ກະກຽມທຳບຸນໄວ້ແລ້ວກ່ອນຈະຮອດວັນເຂົ້າພັນສາ ເຊິ່ງປີນີ້ຕົນກໍ່ຄິດວ່າຄືຊິຂາຍດີເໝື່ອນປີຜ່ານໆມາ.
ສຳລັບ ຮ້ານ ນາງມະນີວັນ ຂາຍເຄື່ອງກອງບຸນບອກວ່າ: ໃກ້ຮອດວັນບຸນເຂົ້າພັນສາຂອງທຸກໆປີຕົນມີການຫ້າງຫາກະກຽມສີນຄ້າທຸກ
ຢ່າງເພື່ອນຳມາຈຳໜ່າຍ ເຊິ່ງປີນີ້ ກໍ່ເປັນອີກປີໜຶ່ງທີ່ຄຶກຄັກ ຄືກັບປີທີ່ຜ່ານໆມາເພາະພໍໄກ້ຮອດວັນບຸນເຂົ້າພັນສາຫນຶ່ງອາທິດ
ກໍ່ມີລູກຄ້າເຂົ້າມາຖາມຊື້ເຄື່ອງ ສັງກະທານໄວ້ແລ້ວເຮັດໃຫ້ຕົນໄດ້ຂາຍດີຕັ້ງແຕ່ໜຶ່ງອາທິດທີ່ຜ່ານມາແຕ່ໃກ້ຮອດວັນບຸນເຂົ້າພັນສາໜຶ່ງ
ມື້ກໍ່ບໍ່ຮູ້ວ່າຊິໄດ້ຂາຍດີຊຳໃດເພາະດຽວນີ້ແມ່ຄ້າບາງຄົນຫັນ ມາດຳເນີນທຸລະກິດຂາຍເຄື່ອງກອງບຸນພາກັນ ເຊິ່ງກໍ່ສ້າງຄວາມໜັກໃຈຢູ່ໜ້ອຍໜຶ່ງໃຫ້ກັບຕົນ.
ເຈົ້າຂອງຮ້ານເນັ້ນຕື່ມວ່າ: ເຮົາເຮັດທຸລະກິດກ່ຽວກັບຂາຍ ເຄື່ອງກອງບຸນທຸກວັນນີ້ສິ່ງສຳຄັນເຮົາຕ້ອງຮູ້ຈັກພັດທະນາຮ້ານໃຫ້ດີຂຶ້ນໄປເລື້ອຍໆ ໂດຍສະເພາະຕ້ອງຮູ້ຈັກເຄື່ອງກອງບຸນທຸກປະເພດທີ່ນຳມາຈຳໜ່າຍ ແລະ ກໍ່ຕ້ອງຮູ້ຈັກການໃຊ້ໃຫ້ຖືກ
ຕ້ອງໃນການເອົາໄປທຳບຸນທັງສາມາດແນະນຳໃຫ້ລູກຄ້າຮູ້ໄດ້, ນອກຈາກນັ້ນເຄື່ອງກອງບຸນທີ່ນຳມາຈຳໜ່າຍກໍ່ຕ້ອງມີຄົບເວລາລູກຄ້າຖາມຫາ ແລະ ສິ່ງນີ້ລະທີ່ເຮັດໃຫ້ທຸລະກິດຂາຍເຄື່ອງກອງບຸນ ຂອງຕົນເຕີບໃຫຍ່ຂະຫຍາຍຕົວມາໄດ້ເຖິງ 4 ປີ.
ນາງ ສີນ ແມ່ຄ້າຂາຍໝາກໄມ້ບອກວ່າ: ເຖິງແມ່ນວ່າຕົນຈະມີອາຊີບຂາຍໝາກໄມ້ເປັນອາຊີບຫຼັກ ແລະ ສຳລັບວັນສຳຄັນກໍ່ຄື ວັນບຸນເຂົ້າພັນສາແລ້ວຕົນເອງບໍ່ພາດທີ່ຈະນຳສີນຄ້າປະເພດເຄື່ອງສັງກະທານມາຈຳໜ່າຍເພີ່ມນຳອີກ ເຊິ່ງຕົນກໍ່ມີການຫ້າງຫາກະກຽສັ່ງຊື້ໄວ້ຕັ້ງແຕ່ຕົ້ນເດືອນກໍລະກົດ ແລະ ສີນຄ້າເຄື່ອງສັງກະທານດັ່ັງກ່າວພໍແຕ່ວາງຈຳໜ່າຍກໍ່ມີຄົນມາຖາມຊື້ແລ້ວ ແລະ ຄາດວ່າໃກ້ຮອດວັນເຂົ້າພັນສາ 1 ມື້ສີນຄ້າດັ່ງກ່າວຈະໄດ້ຂາຍດີກວ່ານີ້ຢ່າງແນ່ນອນ.
ຕອນທ້າຍນາງສີນຝາກບອກຕື່ມວ່າ: ຂໍເຊີນຊວນຊາວພຸດທັງຫຼາຍມາຮວ່ມກັນເຮັດບຸນໃສ່ບາດໃຫ້ຖືກຕ້ອງຕາມຮີດຄອງປະເພນີລາວທີ່ມີມາແຕ່ດັ່ງເດີມ ແລະ ອານຸຮັກຮັກສາໄວ້ເພື່ອເປັນແບບຢ່າງທີ່ດີໃຫ້ລູກຫຼານໄດ້ສືບທອດ ແລະ ຊາວຕ່າງຊາດໄດ້ເຫັນວ່າລາວເປັນປະເທດໜຶ່ງທີ່ມີວັດທະນາທຳອັນດີງາມບໍ່ນ້ອຍໜ້າຊາດອື່ນໆ. |